_Cilacap – Journal News_
Wong Jeruklegi Kulon, Kecamatan Jeruklegi, Kabupaten Cilacap esih pegang teguh karo budaya Jawa. Buktine, Senen Pon tanggal 15 Juni 2026, jam songo bengi mau, pendopo desa rame banget. Wong sak desa teka kabeh, tujuane siji: nonton wayang kulit.
Dalange ya dalang kondang soko Banyumas, Ki Hadi Siswocarito. Lakone “Babad Alas Mandolosroyo”. Critane mbabat alas, mbangun peradaban. Cocog karo kahanane desa saiki.
*Kades Ritam: Wayangan Iki Ana Tujuane*
Pak Ritam Sugianto, Kades Jeruklegi Kulon, karo Ibu nyambut tamu. Nang sambutane, Pak Kades ngomong blak-blakan.
“Wayangan iki sing pertama, tujuane nguri-nguri budaya Jawa ben aja ilang. Sing nomer loro, kanggo nyambut taun anyar Hijriyah 1448 H, syukur-syukuran. Sing nomer telu, tasyakuran perangkat desa”.
Pak Kades uga matur bab pembangunan. “Alhamdulillah, pembangunan fisik wis mlaku. Kali-kali wis dinormalisasi, dalan-dalan wis pada apik. Tapi aja cepet puas, ayo padha nyengkuyung bareng”.
Ora lali, Pak Kades ngelingna. “Dela maning ana hajatan gede, Pilkades. Dadi warga kudu ngerti, gunakna hak pilih sing becik. Aja golput”.
*Camat Irwan: Anggaran Seret, Nanging Kudu Pinter*
Sing mewakili Forkopimcam, Pak Camat Jeruklegi Irwan Arianto, STP. M.Si. uga munggah mimbar. Bahasane ceplas-ceplos khas wong Ngapak.
“Anggaran taun 2026 iki lagi seret, prihatin. Mula, pemerintah desa kudu pinter-pinter ngatur duit sing ana. Ojo boros, sing penting ngena”.
Nanging Pak Camat muji Pak Kades Ritam. “Tapi nyatane, pembangunan nang Jeruklegi Kulon rata kabeh, tekan Kadus-Kadus. Matur nuwun Pak Kades. Iki pas karo lakon Babat Alas mau. Jenenge mbabat alas ya kudu wani, kudu sregep. Cocog karo kinerjane Pak Kades”. (SW)
Komentar